На само еден ден пред свечениот дочек на Новата година на скопскиот плоштад „Македонија“, градоначалникот Орце Ѓорѓиевски конечно ја објави комплетната музичка програма за настанот.

Програмата започнува во 19:45 часот со настап на Миле Кузмановски, по што следуваат Огнен Здравковски и Дина Јашари. Празничната атмосфера ќе ја заокружат легендарните Куку Леле и Тамара Тодевска, а младата публика ќе ужива во настапите на Пајак, Лара и Два Бона.

Кулминацијата на вечерта и магичниот момент на пречекот на Новата година ќе го одбележи настапот на Каролина Гочева, вели Ѓорѓиевски во објава на „Фејсбук“.

„Доста беше мрак. Време е за заедништво и за радост. Со домашни изведувачи, љубени од публиката, создадовме програма што ги поврзува сите генерации. Ова е наш подарок за градот убав – за повторно да пулсира и да сонува“, напиша Ѓорѓиевски.