Кој треба да прими втора бустер доза вакцина против ковид-19?
Во САД пред неколку дена е одобрена втора бустер доза за луѓе постари од 50 години. Кој и кога треба да ја прими оваа доза?
Според американската Администрација за храна и лекови (ФДА), оваа доза би требало да ја примат луѓето постари од 50 години, најрано четири месеци по примањето на првата бустер доза. Таа исто така се препорачува за сите постари од 12 години, кои имаат нарушен имунитет.
Оние кои како прва доза и прв бустер ја примиле вакцината „Џонсон и Џонсон“, сега можат да примаат „Фајзер“ или „Модерна“.
Истражувањата покажале дека нивото на антитела опаѓа како што одминуваат месеците, особено кај постарите лица со слаб имунолошки систем. Поради тоа, важно е да се знае кога е време за втората бустер доза, но исто така е важно да не се прима прерано, бидејќи тоа ѝ ја намалува ефикасноста.
Што се однесува до другите луѓе, кои во моментот не спаѓаат во групите кои би требало да ја примат втората бустер доза, можно е наесен и тие да бидат вклучени во листата, доколку бројот на заболени продолжи да расте, пишува „Си-ен-ен“.