Актуелниот директор на владината Служба за општи и заеднички работи (СОЗР), Ивица Томовски, е сериозен кандидат да стане нов генерален секретар на ВМРО-ДПМНЕ, пишува „Фокус“ повикувајќи се на свои информации.

Владејачката партија на почетокот на следниот месец ќе одржи редовен изборен Конгрес, на кој се очекува трет последователен претседателски мандат да добие Христијан Мицкоски, кој веќе најави големи промени во структурата на ВМРО-ДПМНЕ.

Мицкоски подолг период наназад најавува дека по конгресот, кој треба да се одржи на 6-ти декември во Кавадарци, ќе има промени во ВМРО-ДПМНЕ, а потоа и во Владата, меѓутоа не открива кого ќе опфатат овие кадровски промени.

Откако Мицкоски за првпат стана партиски лидер на валандовскиот Конгрес во 2017 година, потпретседатели на партијата непрекинато досега се вицепремиерот и министер за транспорт Александар Николоски и министерот за одбрана Владо Мисајлковски.

По последниот Конгрес одржан во Скопје пред четири години, пак, нови потпретседатели станаа тогашниот градоначалник на Аеродром Тимчо Муцунски, кој во меѓувреме стана министер за надворешни работи, како и актуелната министерка за финансии, Гордана Димитриеска-Кочоска.