Кој е кинескиот милијардер осуден на 18 години затвор

Фото: EPA/MICHAEL REYNOLDS

Кинескиот милијардер Сун Даву (67) е осуден на 18 години затвор. Тој е уште еден од низата казнети бизнисмени кои ја критикуваат власта во таа земја. Како што пишува Би-би-си, Сун раководи со една од најголемите приватни аграрни фирми во северната провинција Хебеи.

Тој порано отворено зборуваше за човековите права и за политички чувствителни теми.

Прогласен е за виновен за „провокативен говор и предизвикување неволји“, што претставува обвинение кое често се користи против активистите во Кина. Освен тоа, обвинет е за нелегално поседување земјиште, собирање толпа за напад на државни агенции и опструирање на владини работници при вршење на нивната работа.

Компанијата на Сун е една од најголемите во земјата, а се занимава од производство на месо и храна за домашни миленици, до снабдување на болници и училишта со храна.

Тој лани беше притворен, заедно со 20 роднини и соработници, поради спор со земјоделски комбинат во државна сопственост. Во таа пригода, како што јавува Франс прес, во инцидентот биле повредени десетина негови вработени.

Сун е близок со некои познати кинески дисиденти, а ја критикуваше и владината рурална политика. Тој отворено ја обвини владата дека ја прикрила епидемијата на свински грип која нанесе директна штета на неговата компанија.

Сун ги негираше сите обвиненија и за себе рече дека е истакнат член на Комунистичката партија. Но призна дека направил грешка со тоа што објавувал пораки на интернет.

Кина, како што пишува Н1, води кампања против компании и претприемачи во земјата. Големите технолошки фирми, меѓу кои Алибаба, Диди и Тенцент, се на мета на истраги.

 

Видео на денот