Финалниот концерт на првата интернационална турнеја на младиот кочански бенд „Корка“ ќе се одржи на 19 јануари, со почеток во 21 часот, во кафе и филм „Котур“ во Скопје.

Турнејата почна на 3 јануари со концерт во Приштина, а потоа следуваа настапи во Подгорица, Задар, Љубљана и Белград. Оваа турнеја доаѓа по неколку настапи на „Корка“ надвор од Македонија во текот на минатата година.

„Корка“ го издадоа своето прво самонасловено ЕП во мај 2025 година и веќе се добро познати на македонската публика. Тие се истакнуваат отсликувајќи го гневот на младите луѓе преку нивниот тврд, емотивен и некомпромитирачки ноиз-звук.

– Нашите кочански ноиз рок-херои се враќаат дома. Тие годината ја почнаа со концертна прошетка во границите на нашата поранешна држава, покажувајќи им што значи автентичен младешки крик. Но, сега е време да ги пречекаме и да видиме што научиле на пат.

Тие ќе свират во „Котур“, во истото место каде што пред една година, пред да го издадат својот албум, пред да свират надвор од државата, пред да освојуваат награди по Европа, многумина надвор од нивниот роден град првпат насетија дека нешто сериозно се случува меѓу овие млади момци и девојки – истакнуваат од независната музичка издавачка куќа „Мртов коњ“, кои се одговорни за организирањето на турнејата на „Корка“.

(Текстот е објавен во „Културен печат“ број 316, во печатеното издание на весникот „Слободен печат“ на 17-19.1.2026)