Во спортската сала на ООУ „Војдан Чернодрински“ во Скопје, на 26 мај, со почеток во 18:30 часот, ќе биде промовирана збирката „Водопад меѓу две раце“ – песни и писма напишани од членовите на училишниот клуб „Млади библиотекари“ под менторство на Дијана Петкова, а во издание на „ПНВ Публикации“.

Проектот „Водопад меѓу две раце“ е инспириран од поетската збирка „Дениција“ на Петре М. Андреевски. Изработен е во учебната 2024/2025 година и е придонес во одбележувањето на 90-годишнината од неговото раѓање.

Песните во збирката „Водопад меѓу две раце“ се пресоздавање на песните за Дениција од истоимената збирка на Петре М. Андреевски. Збирката содржи 51 песна и 16 писма. Поделена е на три циклуса.

Песните од првиот циклус „Капе светлина“ се создадени со користење на техниката затемнување на околниот текст, во песните од циклусот „Светлосни преѓи / Постојана убавина“, користена е техниката книжевен колаж, а во третиот циклус „Писмо до сакана личност“, техниката писмо до себеси, а потоа секој напишал писмо до сакана личност.

Збирката ќе ја промовира проф. д-р Весна Мојсова-Чепишевска, стихови ќе читаат актерката Христина Цветаноска и учесниците во проектот, а модераторка е Јулијана Величковска.

Средствата од продажбата на книгата ќе се искористат за набавка на новите лектирни изданија за учебната 2026/2027 година, извести Дијана Петкова, ментор на проектот.