По повод празникот „13 Ноември“, како и по повод својот 78. роденден, Градската библиотека „Браќа Миладиновци“ во Скопје целиот месец ноември го посветува на автори и дела од и за Скопје. Токму затоа и во кампањата „Читаме современи македонски автори“, книга на месецот е монографијата „Урбани легенди“ од современиот хроничар на градот – Васко Марковски.

Разговор со Васко Марковски, автор на книгата на месецот „Урбани легенди“, ќе се одржи на 7 ноември, со почеток во 19 часот, во спомен-собата „Т’га за југ“ на библиотеката „Браќа Миладиновци“.

– Авторот на книгата опфаќа еден широк временски период во истражувањата на урбаните феномени, во неа се споменуваат личности и настани од шеесетите години, па сѐ до 2000 година, кога се затвора култното скопско собиралиште „Зи-Зи (Топ)“. Оние кои го доживеале тој период (или периоди) од животот на градот не без возбуда ќе си ги обноват спомените, а помладите генерации ќе имаат можност, на еден автентичен начин, преку личните сведочења на авторот, но и другите сведоци на времето претставено во оваа книга, да се потсетат на традицијата која самата по себе е влезена веќе во легендите – напиша во предговорот за првото издание на книгата, легендарниот хроничар на Скопје, Данило Коцевски.

Васко Марковски е туристички водич, патеписец и литературен преведувач. Завршил студии по турски јазик и книжевност со чешки јазик и книжевност. Дваесетина години работел како новинар во повеќе медиуми (радио, печат и мултимедија).

Во периодот од 2008-2011 бил главен и одговорен уредник на месечникот „Free time guide – Macedonia“, а за неговите патеписи е награден со признанието „Најдобар промотор на Македонија“ за 2010 година.

Автор е на поетската книга „Корпоративно утро“, на монографијата „Урбани легенди“, збирката репортажи „Непозната Македонија“ и збирката поезија „Скопски улици“. Реализирал изложба на фотографии „Комши камерџик“, од турски на македонски јазик превел повеќе дела, меѓу кои и сто песни од познатиот турски поет Орхан Вели („Риба во шишето ракија“, „Антолог“, 2014).

Разговорот со Васко Марковски ќе го води книжевната критичарка Александра Јуруковска, а фрагменти ќе чита актерот Андреј Серафимовски.

Кампањата „Читаме современи македонски автори“ е промоција на македонските писатели и издавачи, но и силна поддршка на македонскиот јазик. Настанот е дел од богатата програма на Град Скопје – Европска престолнина на културата за 2028 година.