КМФ Проект е победник на Купот на Македонија во футсал
КМФ Проект го освои трофејот во Купот на Македонија во футсал откако во финалето што се одигра во Гевгелија го совлада КМФ Кеги Моби од Велес со 8:3.
Препорачано
Тимот од Валандово го оправда статусот на фаворит и забележа убедлива победа, а серијата погодоци ја отвори Горан Стојанов во четвртата минута. Три минути подоцна Бојан Јанев зголеми на 2:0 додека третиот гол беше дело на Мартин Тодоровски, а веќе во 10 минута КМФ Проект имаше предност од 4:0, откако Стојанов повторно се запиша меѓу стрелците.
Во 19 минута трет гол на Стојанов за убедливи 5:0, а во последната минута од првото полувреме Трајче Трајков го постигна првиот погодок за КМФ Кеги Моби.
Во продолжението од натпреварот Никола Анчевски зголеми на 6:1, Кирил Ивановски беше стрелец на вториот гол за Велешани.
Во последните 10 минути од натпреварот гледачите во Гевгелија имаа можност да видат уште три погодоци. Анчевски и Ѓорѓи Коцевски беа прецизни за освојувачот на трофејот КМФ Проект додека Ивановски по втор пат се запиша во листата на стрелците за третиот погодок за КМФ Кеги Моби.
Екипата на КМФ Проект за прв пат триумфираше во Купот, а составот од Валандово ја освојува двојната круна по потврдување на првото место во националниот шампионат.
