„Клуч“ и на Исланд: Се затвораат кафулињата, теретаните и местата за забава
Властите на Исланд денеска наредија затворање на кафулињата, на теретаните и на местата за забава и значително го ограничија бројот на луѓе кои може да се соберат на јавни места во насока на спречување на натамошниот раст на заболени со ковид-19.
На островската држава од денеска се дозволени собири на јавни места до 20 лица, со исклучок на судовите, парламентот и училиштата, соопшти исландското Министерство за здравство. Досегашната мерка за ограничување се однесуваше на 200 лица.
На сила останува и мерката за одржување на социјална дистанца од еден метар додека јавните базени ќе работат со половичен капацитет. Исланд дозволи отворање на кафулињата и теретаните кон крајот на мај, по успешната борба со вирусот, но втората половина на септември донесе забрзан раст на позитивни случаи, како и во други земји на континентот.
Исланд е со популација од 360.000 жители и досега има вкупно 2.980 заразени и 10 смртни случаи.