Среќниот бамбус сo латинско име Драцена сандериана (Dracaena sanderiana) е едно од најпопуларните растенија, пред сè затоа што не бара многу грижа.

Принципот на грижа за ова растение е всушност многу едноставен. Како сечено цвеќе се чуваат во вазна со вода која треба да се надополнува еднаш на секои две недели. Водата што се додава треба да биде претходно зовриена, мека, без хлор и со мала содржина на сол. Може да се користи и дестилирана вода.

Среќниот бамбус значително придонесува за убавината на внатрешниот простор. Со својот едноставен изглед, и уште поедноставен начин на одгледување, внесува мир и позитивна енергија во околината.

Самото име „Среќен бамбус“ зборува за значењето на ова растение во просторот за живеење. Според верувањата и древната кинеска уметност за уредување на просторот, фенг шуи, ова растение ги поврзува главните елементи на животот – водата, земјата, огнот, металот и дрвото и ги доведува во рамнотежа.

Исто така, според Фенг Шуи, важно е да го поставите на вистинското место во просторот. Ако го поставите во источниот дел од домот, ќе донесе здравје во семејството, а во југоисточниот дел ќе донесе позитивна енергија и благосостојба.

Одлично е што ова е многу приспособливо растение. Не бара многу светлина, па успева во потемни простории како ходник, поткровје и бања.

Но, мора да знаете дека неговите лисја можат да пожолтат од премногу директна светлина или хлорирана вода.