Граѓаните утре ќе ја постават Велигденската трпеза поскромно отколку лани, судејќи според цените. Килограм јагнешко месо чини 600 денари, цената на јајцата е од 7 до 10 денари, пиперките се искачија и до 200 денари од килограм, а краставиците се 120 денари за килограм. Доматите достигнуваат и до 180 денари за килограм. Килограм пилешко месо се движи меѓу 450 и 500 денари. Граѓаните веќе со месеци се борат со инфлацијата и поскапувањето на живеачката, особено на храната. Трошоците за живот во март годинава споредено со март минатата година се зголемени за 4 проценти. Најголем е растот на цените на овошјето и на зеленчукот.

Во пресрет на Велигден денеска се прават последните пазарења. Пазарите се полни а има гужва и во маркетите.

Од Асоцијацијата на земјоделци велат дека цената на јагнешкото и свинското месо не е зголемена за Велигден.

Месо има, и свинско и јагнешко, цената е иста. Јагнешко месо е од 230 до 280 денари за килограм но таа цена не може да биде крајната бидејќи јагнешкото дава 55 проценти рандаван. Кога ќе се додадат кланичните услуги цената е од 600 до 700 денари, вели Гоце Серафимов, потпретседател на Асоцијацијата.