Украинскиот министер за финансии Сергиј Марченко денеска изјави дека договорот за соработка во развојот на минерални ресурси меѓу Украина и САД нема да биде финализиран оваа недела, иако двете страни постигнале одреден напредок во преговорите, јавија медиумите.

Изјавата доаѓа една недела по потпишувањето на меморандумот за разбирање, кој требаше да послужи како основа за конечниот договор. Во документот беше наведено дека двете страни имаат цел да ги завршат преговорите до сабота, додека американскиот претседател Доналд Трамп претходно изрази надеж дека договорот ќе биде потпишан уште денеска.

Украина располага со значителни резерви на таканаречени „критични минерали“, клучни за производство на технологија, воени системи и обновлива енергија, вклучувајќи бакар, никел, литиум и титаниум. Пред целосната руска инвазија во 2022 година, минералите сочинуваа 6,1 отсто од БДП на Украина и 30 отсто од извозот.