Американската пејачка Кети Пери ја изгуби долготрајната правна битка со австралиската дизајнерка Кети Пери. Да, добро прочитавте – Кети против Кети. Двете се тужеа една со друга за правото да го користат своето име во трговска марка, а најновата одлука на Високиот суд на Австралија ја заврши правната битка, пренесуваат странските медиуми.

Спорот меѓу поп-ѕвездата и модната дизајнерка од Сиднеј, сега позната како Кети Тејлор, трае со години. Тејлор го регистрираше името Кети Пери за својот моден бренд во 2007 година, по што поднесе и барање за трговска марка. Од 2008 година, таа продава облека под тоа име на локалните саеми и преку својата веб-страница и социјалните мрежи.

Како што Кети Пери стануваше сè попопуларна низ целиот свет, нејзините адвокати ја замолија Тејлор да престане да го користи тоа име за нејзиниот бренд и објавија дека ќе ја оспорат трговската марка, но подоцна ја отфрлија тужбата.

– Кога го започнав мојот бренд, никогаш не слушнав за пејачката. Само градев моден бизнис под името со кое сум родена – рекла дизајнерката.

Тејлор ја тужеше поп-ѕвездата за повреда на трговска марка во 2019 година, тврдејќи дека за време на австралиската турнеја на Кети Пери во 2014 година, таа ги прекршила нејзините права продавајќи јакни, маички и тренерки. Иако доби пресуда во своја корист во 2023 година, таа беше поништена една година подоцна откако пејачката поднесе жалба. Сепак, на 11 март оваа година, Високиот суд на Австралија донесе конечна одлука во корист на дизајнерката.

Судот заклучи дека Кети Тејлор не го оштетила угледот на американската пејачка ниту ги завела потрошувачите со својот бренд на облека. Судиите проценија дека угледот на пејачката во Австралија е толку силен што никој нема да го помеша нејзиниот идентитет со брендот на австралиската дизајнерка.

Тие исто така го отфрлија аргументот на адвокатите на Кети Пери дека пејачката веќе имала значаен углед во Австралија кога Тејлор аплицирала за трговската марка во 2008 година, врз основа на тоа дека тој углед не се однесува на пазарот на облека.

Дизајнерката Кети Тејлор изрази олеснување по одлуката.

– Ова беше неверојатно долго и тешко патување. Денешната одлука го потврдува она во што отсекогаш верував, дека трговските марки треба да ги штитат бизнисите од сите големини. Никогаш не стануваше збор само за името. Стануваше збор за заштита на малите бизниси во Австралија, за борба за она што е исправно и за покажување дека сите сме важни – рекла таа.

Според „Гардијан“, претставник на поп-ѕвездата изјавил дека Кети Пери „никогаш не се обидела да го затвори бизнисот на г-ѓа Тејлор или да ја спречи да продава облека под името Кети Пери“.

Во соопштението се вели: „Високиот суд денес пресуди, со 3 наспроти 2, дека трговската марка на г-ѓа Тејлор може да остане во регистарот. Судот, исто така, го врати случајот во Федералниот суд за понатамошно утврдување на прашањата што ги покрена Кети Пери, вклучително и тоа дека г-ѓа Тејлор чекала десет години пред да покрене постапка против Кети Пери“.

ФОТО | Врската станува сериозна: Кети Пери за првпат му се придружи на Џастин Трудо на политички настан во Јапонија