Ќе се бараат експерти и под дрво и под камен

epa08407238 Women wearing protective masks walk in front of the EU office decorated with Macedonia and EU flags and their logo 'EU for You' in Skopje, Republic of North Macedonia, 07 May 2020. At the European Union-Western Balkan summit on 06 May, EU leaders confirmed unequivocal support to the Western Balkan countries regarding the COVID-19 pandemic. They agreed on giving 3.3 billion euros to help these countries with recovering from the economic crisis. EPA-EFE/GEORGI LICOVSKI

На Македонија ќе и требаат три до четири илјади експерти за водење на пристапните преговори со Европската унија. Според проценките на Секретаријатот за европски прашања токму кадровскиот потенцијал ќе биде најголемиот предизвик во процесот од преговорите за членство со Брисел. Шефот на СЕП, Никола Димитров најави дека поради овој проблем политиката на задржување на компетентниот кадар и привлекувањето нов, ќе биде поставено за прашање од највисок државен интерес, повикувајќи ја администрацијата „Европа да ја донесе дома“.

Универзитетскиот професор Борче Давитковски сепак е скептик во однос на подготвеноста на административните кадри да се справат со тежината на процесот, посочувајќи дека нема да оди лесно привлекувањето на квалитетен кадар.

-Немаме такви капацитети што би ги воделе преговорите. Тука најмногу Универзитетот ќе помогне исто како што помогнавме и со одговорите во прашалниците од 2005-тата година. Ова е многу сериозна работа, а воопшто и не произведуваме таков кадар, односно немаме лица со вистински капацитети и лица што можат да преговараат со бриселските бирократи, вели професорот Давитковски.

Од друга страна, доза на оптимизам споделува д-р Малинка Ристевска Јорданова од Институтот за европска политика, која пак очекува бројката од три до четири илјади експерти во процесот да биде надмината.

-Најпрвин – сѐ е достижно, зависи од политичката волја и соодветноста на мерките што ќе се преземат. Второ, кога зборуваме за експерти кои треба да бидат ангажирани во преговорите, треба да имаме предвид дека не се работи само за оние кои директно ќе работат на подготовка на материјали или дијалог во текот на преговорите. Се работи, во првиот круг, за оној дел од администрацијата која работи на усогласување на политиките, односно правото на ЕУ и нивна координација. Во вториот круг – секаде кадешто некоја институција има надлежност за материја покриена со правото или политиките на ЕУ – таа е ангажирана во процесот на преговори. Таа бројка тогаш сигуно ќе ги надмине споменатите 3000-4000, истакнува Јорданова.

Професорот Давитковски тврди дека генерално во институциите вработувањето се одвива по партиски клуч, а во министерствата така и се напредува, посочувајќи дека се назначуваат раководители на сектори и одделенија кои немаат соодветни познавања, па дури и познавање на англиски јазик, а во текот на професионалниот ангажман биле пратени на службени задачи во Брисел, а нивната работна посета не вродила никаков плод.

-Од такви луѓе не можете да очекувате да ги отворат поглавјата. Пред испратени експерти од Европската унија, тука во Скопје, го бранев Законот на управни работи, а заедно со колегата Камбовски и Законот за прекршоци. Експертите од Брисел беа дванаесет на број, а ние само двајца. Од Министерството за правда не се сетија да пратат ниту записничар, нагласува Давитковски.

Политизацијата на кадрите во администрацијата е суштински проблем и според Јорданова, која предлага да се мотивираат постојните квалитетни службеници, додавајќи дека тоа не мора да значи дополнителни материјални стимулации, туку поставување на соодветни места, услови за работа, простор за изразување на своите способности и знаења.

-Клучно е да се задржат постојните компетентни кадри и тие да се мотивираат. Во администрацијата има луѓе кои имаат огромно знаење и искуство во процесот на интеграција на ЕУ – тие треба да се стават целосно во погон. Досега најголем проблем беше што таквите професионалци се демотивираа, најмногу поради континуираната политизација на администрацијата и неценењето на нивниот придонес, а многумина и си заминаа од администрацијата. И оние што се надвор од администрацијата можат да се стават во функција на процесот на многу начини – проекти, систем на консултации, итн., додава Јорданова.

Инаку, во владината програма за четиригодишниот мандат беше истакнато дека вниманието ќе се насочи кон вработување на квалитетни кадри и нивно задржување во државната служба, развој на нивната кариера и обука, наградување и плати, мотивација, но од друга страна ќе се работи на промени во структурата, квалитетот и големината на администрацијата, разгледувајќи неколку модели за намалување на обемот на администрацијата за 20%.

 

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот