Во близина на средното училиште „Димитар Влахов“, инспекторите на Општина Аеродром денеска изрекле казни во висина од 1.300 евра за компанија и одговорно лице кои дозволиле камиони со валкани гуми да се движат по коловозот на булеварот „Трета македонска бригада“,

Компанијата била казнета со 1.000 евра, додека пак одговорното лице добило казна од 300 евра поради прекршување на Законот за јавна чистота.

„При извршена контрола на градилиште во близина на СУГС „Димитар Влахов“ на булевар „Трета македонска бригада“, инспекторите утврдија дека градежни возила се движеле по коловоз со нечисти гуми, со што се нарушува чистотата на јавните површини и се создава дополнително загадување“, велат од Општина Аеродром.

Од Општината истакнаа дека во наредниот период ќе се интезивираат контролите на сите активни градилишта.

„Во наредниот период ќе продолжат и дополнително ќе се интензивираат контролите на сите активни градилишта. Особено внимание ќе се посвети на почитувањето на мерките за заштита на животната средина, спречување на загадувањето и несоодветното одлагање отпад, одржувањето чиста и безбедна околина околу градилиштата, како и на заштитата на јавните површини од узурпација“, се вели во објавата.