Многумина посветуваат големо внимание на негата на лицето, но стапалата често остануваат занемарени. Деновиве, на самиот праг на пролетта, кога времето постепено се затоплува и полека почнуваме да носиме поотворени чевли, вниманието сè почесто се насочува кон изгледот на стапалата. Токму тогаш многумина забележуваат дека петите се суви или испукани, пишува „Живим“.

Освен што не изгледаат убаво, сувите и испукани пети можат да предизвикаат и поголем проблем. Ако се занемарат, на кожата можат да се појават подлабоки пукнатини кои се болни и го зголемуваат ризикот од инфекции.

Некои од најчестите причини за сува кожа на петите се недоволна нега, долго стоење, несоодветна обувка, но и состојби како прекумерна телесна тежина или менопауза. Добрата вест е дека во кујната често се кријат состојки со корисни својства кои можат да помогнат во негата на стапалата.

Банана – природен хидратант

Бананата е богата со хранливи материи, меѓу кои витамините А, Б6 и Ц, кои помагаат кожата да ја задржи еластичноста и влажноста. Таа делува како природен хидратант и може да помогне во спречување на сушење и пукање на кожата.

Потребни состојки:

2 зрели банани

Подготовка:

Испасирајте две зрели банани додека не добиете мазна паста. Избегнувајте незрели банани бидејќи содржат киселини кои не се погодни за кожата. Нанесете ја смесата на стапалата, особено на петите, прстите и ноктите. Оставете да делува околу 20 минути, а потоа измијте со вода. Постапката повторувајте ја секоја вечер најмалку две недели.

Мед – природен антисептик

Медот се смета за природен антисептик кој помага во заздравување на испукани пети. Воедно ја хидрира кожата и спречува нејзино сушење, а неговите смирувачки својства придонесуваат за нејзина регенерација.

Потребни состојки:

• 1 шолја мед
• топла вода

Подготовка:

Во сад со топла вода додадете една шолја мед. Потопете ги стапалата околу 20 минути и нежно масирајте ги. Потоа исушете ги и нанесете хидратантна крема. Постапката повторувајте ја редовно неколку недели, најдобро пред спиење.

Маслиново масло – ја храни и обновува кожата

Маслиновото масло е богато со витамини А, Д и Е, кои помагаат во обновување на кожата и поттикнуваат создавање нови клетки.

Потребни состојки:

• 2 лажици маслиново масло

Начин на употреба:

Измијте ги и добро исушете ги стапалата. Нанесете подебел слој масло, особено на петите и прстите. Облечете чисти памучни чорапи и оставете да делува преку ноќ. Постапката повторувајте ја секоја вечер.