На 16 март Ненад Марковиќ од Хрватска, официјално бил прогласен за мртов иако e жив. За оваа шокантна ситуација дознал дури три дена подоцна, на 19 март, сосема случајно, кога се обидел да надополни ваучер за телефон преку апликација, пишува 24 часа.

Трансакцијата не била реализирана бидејќи неговата картичка била блокирана. Се обидел со друга картичка, но без успех. Веќе следниот ден, на 20 март, решил лично да провери за што се работи и посетил две банки. Тие му рекле истото и во двете – сметките му се блокирани бидејќи бил регистриран во системот како починато лице.

Како што дознава порталот, станува збор за сериозна грешка што се случила во Општата болница Вировитица. Таму на 16 март починал друг маж со исто име и презиме. Меѓутоа, при евидентирањето на податоците, покрај починатиот е внесен и матичниот број на Ненад Марковиќ, кој е жив, што довело до промена на идентитетот со сериозни последици.

Според достапните информации, не станува збор само за административна грешка. Постојат сериозни индикации дека починатиот пациент бил примен и лекуван под туѓ идентитет, здравствен картон и медицинска документација на Ненад Марковиќ од Вировитица.

Хрватското здружение за промоција на правата на пациентите остро реагираше, нарекувајќи го овој настан „незамислив и неприфатлив во 21 век“.

„Ова е најсериозно кршење на достоинството и безбедноста. Постоечките системи не се сигурни, контролите не функционираат, а протоколите за идентификација очигледно не се спроведуваат“, порачаа од Здружението.