Сите жители на  Карпош кои од денеска ќе купат нов велосипед, трицикл или карго велосипед можат да очекуваат дека Општината ќе им надомести дел од парите.

Денеска е објавен јавниот повик на кој карпошани можат да се пријават за субвенцијата која ја дава Општината, а која изнесува 30 % од цената на купување нов велосипед, но не повеќе од 5.000 денари.

Сите заинтересирани за да остварат право на субвенција треба да поднесат барање, изјава за согласност за обработка на лични податоци, фотокопија од лична карта, трансакциска сметка и фискална сметка за купен велосипед, трицикл или карго велосипед, кој е купен не порано од 23 март 2026.

Жителите кои веќе оствариле право на субвенција во тековната година и добиле средства  од Град Скопје, немаат право да учествуваат на огласот. Барањата со комплетна документација ќе се доставуваат до архивата на Општина Карпош ул.Никола Русински бр.11 . По поднесувањето на документите, подносителите во писмена форма ќе бидат известени дали ќе бидат корисници на предвидените средства за субвенција за купување на нов велосипед , трицикл и карго велосипеди – се наведува во јавниот повик.

Субвенционирањето ќе трае до исцрпување на средствата, а ќе се спроведува по принципот „прв дојден, прв услужен“.