Капитенот на фудбалската репрезентација на Канада и левиот бек на Баерн Минхен, Алфонсо Дејвис, како што објави „Спортс Илустрејтед“ ќе го пропушти првиот натпревар на својот тим од групата „Б“ на Светското првенство против Босна и Херцеговина во Торонто. Веста ја потврди селекторот на Канада, Џеси Марш, на прес-конференција пред мечот во петок (21.00 часот по средноевропско време).

Статусот на ѕвездата на Баерн, вредна 40 милиони евра, е актуелна тема откако се приклучи на националниот тим на 1 јуни. Дејвис и Марш сè уште не открија јавно дали ќе се опорави навреме од повредата на тетивата што ја доби на 6 мај во полуфиналето на Лигата на шампионите против Париз Сен Жермен.

Поради скинат преден вкрстен лигамент, други повреди и замор, Дејвис одигра само два од последните 21 натпревар на Канада. Тој исто така ја пропушти првата недела од тренинг кампот во Шарлот и од пристигнувањето главно тренираше одделно со независниот специјалист Матијас Бланкенбург. Тоа беше договор меѓу Баерн, Дејвис и Канадската фудбалска федерација како дел од протоколот за враќање на теренот.

Марш не ја исклучи можноста Дејвис да игра подоцна во групната фаза.

– Мислам дека присуството на неговиот приватен физиотерапевт таму беше од голема помош, како и секојдневниот фокус на она што му е потребно на неговото тело. Затоа навистина се надеваме дека во наредните денови и недели ќе можеме да го забрзаме неговото враќање и наскоро да му дозволиме да придонесе за тимот – рече Марш.