Со Лав Четиринаесетти, Божик во Ватикан ќе го слави нов папа, но божиќните традиции што се омилени кај посетителите и верниците, остануваат непроменети во центарот на Римокатоличката црква.

Кога започнуваат прославите?

За католиците, периодот од четири недели пред Божик, а со него и очекувањето на Христовото раѓање, оваа година започна на 30 ноември, првата недела од предбожиќните четири седмици, т.н. Адвент.

Но, прославите во Ватикан секогаш започнуваат со официјалното осветлување на елката и откривањето на јаслите, сцената на раѓањето на Исус на плоштадот Свети Петар, што оваа година се одржа на 15 декември.

Каква елка стои во Ватикан?

Секоја година, различна римокатоличка бискупија ја донира елката за  Ватикан,  што се смета за посебна чест. Оваа година станува збор за норвешка смрека од покраината Болцано во Јужен Тирол, која е висока 27 метри и тежи околу осум тони.

Бискупот Иво Музер од Болцано-Бриксен во интервју за веб-страницата на Ватикан изјави:

„Се надевам дека нашата елка ќе предизвика и чудење за создавањето и ќе поттикне на размислување“. Тој ги повика луѓето да бидат внимателни, да се почитуваат и да бидат подготвени да „усвојат одржлив и едноставен начин на живот“.

Дали тоа ќе биде можно со оглед на раскошните декорации и постојано менувачките светлосни дисплеи?

Ова е петта година по ред што елката доаѓа од Италија. Досега четири елки дојдоа од Германија, во 2028 година, повторно ќе биде редот на Германија: елка е предвидено да биде испорачана од Дегендорф во Долна Баварија.

Самиот Божиќ во Ватикан се слави раскошно најмалку половина милениум, но на плоштадот „Свети Петар“ имало елка само од 1982 година, за време на понтификатот на Јован Павле Втори.

Кои јасли се изложени?

Сцената од  Христовото раѓање доаѓа од диоцезата Ночера Инфериоре-Сарно во јужната италијанска покраина Салерно, Кампанија. Сцената од Христовото раѓање, со своите фигури во природна големина, вклучува елементи типични за регионот околу Ночера. Бискупот Џузепе Џудиче изјави дека тоа е „одлична можност за евангелизација и обнова на целата област“.

Во исто време, под левата колонада на плоштадот Свети Петар оваа година по осми пат се прикажува изложбата „100 сцени од Христовото раѓање во Ватикан“. На неа се претставени 132 сцени од Христовото раѓање создадени од уметници од 23 земји.

Овогодишната изложба е дел од културната програма „Giubileo è Cultura” (Јубилејот е култура) и, според „Ватикан њуз“, има за цел да „изрази благодарност за тукушто доживеаната Света година“.

Што се случува на Бадник?

Папата Лав XIV ќе ја одржи свечената полноќна миса во 22:00 часот во базиликата „Свети Петар“. Секако, базиликата ќе биде преполна, па ќе ги отвори вратите во 19:00 часот. Потребни се билети, но тие се бесплатни – и обично се распродадени со месеци однапред.

Што ќе следи потоа?

Не се потребни билети за првиот ден на Божик, кога Папата ќе го упати свечениот благослов „Урби е торби” („Urbi et Orbi“ – „на градот и светот“). Лав XIV ќе застане на балконот на базиликата „Свети Петар“, опкружен со десетици илјади верници на и околу плоштадот „Свети Петар“.

Службата започнува напладне, и тука исто така важи – треба да се стигне што порано – особено во оваа  Света Година,  чиј почеток го прогласи  папата Франциско,  кој почина во април, и која продолжува до крајот на божиќната сезона.

… На новогодишната ноќ (17:00 часот), папата ќе служи вечерна богослужба во базиликата „Свети Петар“, како благодарност за изминатата година.
Кога завршуваат свеченостите?

Со „Светата миса на празникот Богојавление“, предводена од Лав XIV, на 6 јануари во 9:30 часот. Тогаш ќе заврши и  Светата Година.

Извор: DW/ Автор: Катарина Абел