Вештачењето на „фиат пандата“ со која, како што се сомнева, Дејан Драгијевиќ и Срѓан Јанковиќ ја удриле малата Данка Илиќ во Бањско Поље, претставува клучен наод кој може да ги потврди или да ги побие сомнежите на истражителите и во моментов ја забавува понатамошната истрага, објавуваат српските медиуми.

Да потсетиме, Драгијевиќ и Јанковиќ се сомничат дека со спорното службено возило, сопственост на ЈП „Водовод“, го удриле девојчето, а потоа го пренеле телото до непозната локација.

Станува збор за стручно мислење и наод од вештаци што се однесува на реконструкцијата на настанот и техничката анализа на возилото со кое тој ден управувале осомничените – документ што е од суштинско значење за расчистување на случајот.

Клучниот наод што се чека

„Обвинителството сè уште го чека наодот и мислењето од вештаците од Факултетот за технички науки во Нови Сад, кој треба прецизно да ги утврди околностите под кои Данка Илиќ можела да биде удрена со службеното возило на осомничените. Тој дел од вештачењето е од клучна важност, бидејќи без него не може да се оцени целокупната реконструкција и да се потврдат или побијат досегашните сомнежи“, вели извор близок до истрагата.

Ова значи дека обвинителството и судот сè уште не можат да донесат конечни правни одлуки, затоа што не располагаат со официјален стручен доказ за тоа што точно се случило тој ден.

„Вештаците треба да утврдат со која брзина се движело возилото, каде би дошло до контакт и дали е можен удар што би останал незабележан. Овој документ е пресуден за понатамошниот тек на постапката и евентуално поднесување обвинение“, дополнува истиот извор.

Овие информации се потврдени и во ВЈТ Зајечар.

„Против осомничените Дејан Драгијевиќ и Срѓан Јанковиќ, по наредба за дополна на истрагата на ВЈТ Зајечар и по налог на Вишиот суд во Неготин, на 16.06.2025 беше спроведена реконструкција на настанот и други доказни дејствија. Обвинителството чека наод и мислење од Универзитетот во Нови Сад, Факултет за технички науки, кое сè уште не е завршено, по што ќе биде донесена јавобвинителска одлука“, соопштува обвинителството.

Реконструкција на терен

Повеќечасовната реконструкција во јуни 2025 година во Бањско Поље беше една од најважните процесни дејствија.

На лице место присуствуваа осомничените, нивните адвокати, родителите на девојчето, полиција, форензичари и обвинител.

Целта беше детално да се утврди текот на настаните и евентуалната улога на осомничените. Резултатите сè уште не се комплетирани и не е познато кога целата документација ќе биде доставена до обвинителството.

„Наодот од Факултетот за технички науки може да биде точката што ќе го одреди понатамошниот правец на случајот – или кон подигање обвинение и судење, или кон правен пресврт“, додава изворот.

Случајот на исчезнувањето на Данка Илиќ од Бањско Поље кај Бор веќе долго ја држи јавноста во неизвесност. Девојчето исчезна на 26 март 2024 година додека се играло пред семејната куќа. Осомничените беа уапсени на 4 април под сомнение дека со возило ја удриле и се обиделе да ги прикријат трагите.

И покрај тоа, не е пронајден ниту еден материјален доказ – нема ДНК траги, нема докази во возилото, нема сведоци, ниту признание. Осомничените признаваат само дека биле во близина, но тврдат дека детето не го виделе и не го повредиле.

Хронологија на 26 март според пријавените информации:

• 13:10 – Мајката Ивана Илиќ пристигнува со децата во Бањско Поље
• 13:22 – Ја фотографира Данка додека се игра и фотографијата му ја праќа на сопругот
• 13:41 – Забележува дека девојчето го нема и го информира сопругот
• 13:45 – Ја известува полицијата за исчезнување
• 13:50 – Гледа бело возило „фиат панда“ и машко лице покрај него
• 13:52 – Наводно доаѓа до удар со автомобил
• 13:57 – Таткото ги прашува осомничените дали ја виделе – тие негираат
• 13:59 – Полицијата пристигнува на лице место

Продолжен притвор

Во меѓувреме, судот го продолжи притворот за Дејан Драгијевиќ и Срѓан Јанковиќ, поради опасност од влијание врз сведоци и можност за бегство.

„Притворот е продолжен затоа што причините поради кои бил определен и понатаму се присутни. Жалбите на одбраната се одбиени“, наведува извор близок до постапката.

До каде е случајот со исчезнатата Данка?