Јованоски: Моите цели се освојување на европски куп и настап на Олимпијада!
Димитар Јованоски, една од најголемите македонски надежи во триатлонот освен на домашната, блеска и на меѓународната сцена.
Учесници на „3DISCIPLINES.MKD“ од Струга настапија на спринт триатлон натпреварот во Приштина, Косово. При овој клупски настап на натпреварот кој се одржа за првпат, Јованоски го освои првото, а Никола Кутаноски третото место во генерален пласман.
Воедно настапи на суперспринтот триатлонот во Сплит, Хрватска (21. „Marjanski Djir“) и оствари исто така голем резултат како севкупен победник во сите категории.
– За трката во Приштина, јас сум задоволен од настапот и од самата организација на трката. Конкуренцијата беше огромна имаше над 50 триатлонци од различни категории, но успеав да го подигнам нивото и да победам – ни изјави Јованоски.
Надвор од државата тој има повеќе повеќе во дуатлон и триатлон…
– На домашна сцена најголем успех ми е првото место на Топси триатлон трката во Скопје каде бев севкупен победник со најдобро време од сите категории. Надвор од државата имам повеќе победи во дуатлон и триатлон, многу ми значи деветто место на европскиот јуниор куп во Охрид каде бев најмлад јуниор и конкуренцијата беше огромна – додаде македонскиот натпреварувач.
Поддршката е неопходна, а таа секогаш доаѓа од најблиските…
– Со триатлон почнав 2014 година. Почетокот ми е во велосипедизмот каде и сеуште учествувам, па тренирајќи во Струга со дел од триатлонците од Т.К. Титани и на покана на тренерот Никола Кутаноски учествував на трката во Радожда каде освоив второ место и љубовта кон триатлонот се роди. Сеуште мој тренер е Никола Кутаноски, и моите успеси се и негови – вели Јованоски.
Индивидуалните спортови ни носат повеќе успеси, трофеи, така и триатлонот, но и тука се потребни исполнување на потребните услови за тренинзи и учества…
– Во нашиот спорт има многу вложувања и финансиски е тешко да се издржи. Како државен првак на Македонија земам стипендија од Агенцијата за млади и спорт, а другите трошоци одат на мојата фамилија и некои наши пријатели.
Со секој голем резултат, и амбициите стануваат поголеми, со додатна мотивација и позитивна атмосфера до уште поголеми желби…
– Како секој спортист моите цели се освојување на европски куп и претставување на нашата држава на Олимпијада – се зборовите на Јованоски.