Јавните личности со единствена порака од самоизолација: Седи дома!
Македонските познати личности на социјалните мрежи споделија фотографии, видеа, објави од домашна атмосфера, а во описот доминираат хаштазите: #седисидома #stayhome.
Коронавирусот ја презеде централната фаза во животот на сите луѓе низ целиот свет. Додека смртоносниот коронавирус и понатаму се шири по целата планета, познатите личности ги охрабруваат своите илјадници обожаватели и следбеници на социјалните мрежи да останат дома и да се самоизолираат. Придржувајќи се на мерките и правилата што ги издадоа надлежните органи, македонските јавни личности во изминатите денови повикуваат да не излегувате надвор и да го следите нивниот пример за да го зачувате како вашето, така и здравјето на вашите најблиски, но и на другите граѓани.
Во такви периоди кога единствениот начин да се запре ширењето на коронавирусот е да останете дома, нашите познати личности се обидуваат да најдат начини да се забавуваат, но и да упатат силна порака.
Некои од нив најдоа забавен и корисен начин како да го поминат времето во самоизолација, со играње социјални игри, вежбање, пеење, готвење… Наоѓаат начин и како да им го подигнат расположението на своите следбеници во овие тешки денови, па објавуваат доста забавни моменти од секојдневието, духовити сегменти од својот приватен живот, а некои покажаа дека поседуваат и други досега непознати таленти. Има многу начини како да се победи здодевноста, но и стравот и паниката од смртоносниот ковид-19 додека седите дома.
Меѓутоа, сите имаат една заедничка порака: седете дома, заштитете се себеси и другите. Тие ја потенцираат важноста на социјалното дистанцирање.
Македонскиот виртуоз на гитара Влатко Стефановски пред неколку денови ги одушеви фановите со кратка инструментална изведба на својот инстаграм-профил. Во описот на снимката, Стефановски ги напиша хаштазите: #седидома и #shutupandplaytheguitar, укажувајќи им на сите за важноста на самоизолацијата. Некои од одушевените обожаватели побараа од познатиот музичар секој ден да објавува по една инструменталка.
Пејачката Тамара Тодевска од самоизолација со интересен и поучен натпис им порача на сите дека седи дома за безбедноста на своите најмили, но и за сите други. Таа на својот инстаграм-профил објави фотографија на која држи натпис испишан со букви во различни бои: „#Седам дома за сите“.
И пејачката Каролина Гочева во слично издание упати силна порака од самоизолација на Инстаграм. Каролина држи лист хартија на кој пишува: „Седам дома за: тебе, себе, за сите нас“.
Фолк-дамата Блага Петреска се придружува кон препораките #Седидома, но има совет до сите што во овој период се во самоизолација. Пејачката порача – не натрупувајте храна, таа се расипува, хранете го духот.
Влатко Лозаноски сподели дел од својата песна „Не те вадам јас од памет“, каде што во еден стих се спомнува карантин: „Би те чувал јас тебе во карантин“. Пејачот во описот на видеото напиша да останете дома и стоп за ковид-19.
Меѓу многубројните јавни личности што повикуваат на важноста на седењето дома во времето на пандемијата на коронавирусот е и пејачката Викторија Лоба, која им се обрати на своите следбеници со објавата: #седам дома за сите нас.