Јаховиќ неизвесен за мечевите против Ерменија и Исланд!?

Адис Јаховиќ одигра само 16 минути на последниот меч за Гезтепе/Фото: Слободен печат/Драган Митрески

Денеска во рамките од 12 коло во најсилната турска Супер лига составот на Гезтепе загуби дома од Коњаспор со 0:2.

Кај домаќините стартер беше македонскиот репрезентативец Адис Јаховиќ, но само после 16 минути игра од првото полувреме го напушти теренот поради повреда.

Јаховиќ е меѓу повиканите во составот на нашата А репрезентација за последните два натпревари од квалификациите за СП 2022.

За четири дена на 11 ноември во Ереван гостуваме кај Ерменците, а на 14 ноември сме домаќини на Исланд. Со победи и еден „кикс“ на Романците во последните две кола ќе обезбеди пласман во мундијалскиот бараж.

Неизвесно е дали Јаховиќ ќе биде во составот за овие два клучни меча, потсетување во нападот селекторот Благоја Милевски ги има на располагање уште Милан Ристовски, Бојан Миовски, Александар Трајковски, Дарко Чурлинов и дебитантот Ваљон Етеми.

Гезтепе моментно во генералниот пласман во шампионат е на претпоследното 19 место со девет бодови.

Видео на денот