Израелски научници успешно го смениле процесот на стареење на јајце клетки во лабораторија. Во ова значајно откритие објавено во списанието „Aging Cell“, израелските истражувачи посочуваат дека постигнале јајце клетките на 40-годишните жени да ги направат слични на оние кај жените кои се во нивните 20-ти години.

Повеќе од јасно е дека јајце клетките се менуваат со текот на времето и го губат својот квалитет, што воедно го отежнува нивното оплодување кога жената влегува во подоцнежни години.

Додека просечната жена во своите рани 20-ти години има 80 отсто шанси да забремени по природен пат во рок од една година, тој број е преполовен до 40-тата година.

Но, научниците од Хебрејскиот универзитет во Ерусалим сугерираат дека процесот може да се смени со антивирусен лек кој се користи за лекување на пациенти со ХИВ. Се смета дека овој лек делува така што го спречува оштетувањето на ДНК што се случува за време на процесот на стареење.

Сè уште има прашања за тоа дали процесот може да ги зголеми стапките на плодност. Тимот на истражувачи засега планира да го тестира своето откритие на животни, а потоа и на луѓе. Тие, исто така, се надеваат дека третманот може да го намали ризикот од спонтан абортус и вродени маани на фетусите, кои се почести кај постарите трудници.

„Ова би можело да им помогне на жените на возраст меѓу 40 и 50 години. После тоа доаѓаме до менопауза“, објаснуваат научниците.