Израелски функционер изјави дека Хамас не ги знае локациите на пет од 13-те мртви заложници кои сè уште се држат во Појасот Газа, факт што, според израелската страна, покажува дека организацијата се обидува да купи време.

Како што објави израелскиот Ynet, функционерот, кој не беше именуван, рече дека Хамас „игра игри и се обидува да го одложи процесот со цел да го продолжи прекинот на огнот без да премине на втората фаза од договорот, што бара негово разоружување“.

Договорот за прекин на огнот, кој стапи на сила на почетокот на месецот, предвидува враќање на сите заложници од Хамас.

Сепак, од самиот почеток имаше проценка дека некои од телата на тогашните 28 мртви заложници ќе биде тешко да се лоцираат во урнатините на Газа. Оттогаш, под притисок од Израел, Хамас врати 15 тела.

Проценките за бројот на тела што групата може да ги пронајде варираат.

Според израелските одбранбени претставници кои го информирале потпретседателот на САД, Џej Ди Венс, Хамас може да предаде најмалку 10 од 13-те преостанати мртви заложници. Други извори, сепак, проценуваат дека тој број може да биде помал.