Дводневен фестивал со тематски наслов „Превeдувањето во фокусот“ е посветен на книжевниот превод и на сите уметници кои со своето дело ја збогатуваат оваа професија.

Првото издание на фестивалот за книжевен превод ќе се одржи на 17 и 18 април во галеријата „Владимир Бужанчиќ“ во Културниот центар во Нови Загреб, а програмата ќе се состои од серија од шест тематски панели и две работилници за книжевен превод.

Книжевни преведувачи, писатели, издавачи и теоретичари на преводот ќе зборуваат за убавините и предизвиците на преведувањето на хрватската литература на германски и англиски јазик, како и за мостот меѓу културите користејќи го примерот на Хрватска и Северна Македонија.

Тие ќе споделат научни сознанија за влијанието на вештачката интелигенција врз областа на книжевниот превод и актуелниот тренд на репреведувања во литературата за деца и возрасни, а фестивалот ќе заврши со особено интересен панел за преведувачите кои често ја преземаат улогата на тајни книжевни агенти.

На фестивалот ќе учествуваат еминентни хрватски писатели и преведувачи, како што се Марко Грегур, Дамир Каракаш, Моника Херцег, Ивица Баковиќ, а од нашата земја ќе учествува преведувачот и писател Сашо Огненовски, а издавачката куќа „Перун Артис“ од Битола е една од соработниците на фестивалот. Програмски водител на фестивалот е младиот книжевен преведувач од нордиски јазици Един Бадиќ.

Фестивалот се одржува под покровителство на Министерството за култура и медиуми на Република Хрватска, книжевната мрежа „Традуки“, Гете-институтот во Хрватска, НОРЛА и Амбасадата на Кралството Норвешка во Загреб.