Легендарниот хрватски ракометар Иван Чупиќ на крајот од оваа сезона ќе стави крај на славната кариера. По завршувањето на истата тамошните медиуми известуваат дека десното крило планира да започне тренерска кариера.

Чупиќ денеска има 38 години и долги години е на големата ракометна сцена. Во кариерата освои бројни медали и трофеи, а сигурно ќе ги памети и трите титули во Лигата на шампионите, две со Вардар во 2017 и 2019 година, и една со Киелце.

Чупиќ во најдобрите години од кариерата беше меѓу најдобрите светски ракометари, а во ЛШ постигна дури 810 голови.

Ракометот го водеше од родниот Метковиќ, преку Медвешчак, Октавио Виго, Горење Велење, Рајн Некар Ловен, Киелце, Вардар и на крајот – Загреб.

Со репрезентацијата Хрватска освои дури седум медали од големите натпреварувања, но никогаш златни: Олимписка бронза во 2012 Лондон, сребро и бронза на светските првенства во 2009 и 2013 година, а на европските шампионати и по два сребрени медали во 2008 и 2010, и бронзени во 2012 и 2016 година.