Божикната прослава во италијанското место Сетимо Торинезе се претворила во трагедија откако 47-годишен маж починал од задушување со традиционалниот божикен колач – панетоне.

Несреќата се случила во домот на неговите родители, каде што семејството го славело празникот, пишува „Кориере дела сера“.

Жртвата е идентификувана како Џовани Лопез. Според извештаите, Лопез славел во куќата на своите родители на улицата Фолијзо, во населбата Борго Нуово, кога парче од колачот ненадејно му се заглавило во душникот и ги блокирало дишните патишта.

Уплашените членови на семејството веднаш се обиделе да му помогнат и повикале итна медицинска помош.

Иако лекарите пристигнале за само неколку минути, за 47-годишниот маж било предоцна и можеле само да ја констатираат смртта.

На терен излегле и карабинерите и мртовзоротникот, а смртта официјално била прогласена за несреќен случај предизвикан од задушување.