Пет поранешни функционери на Осасуна, двајца поранешни играчи на Бетис, како и двајца бизнисмени, Судот во Навара ги прогласи за виновни и им одреди затворска казна за низа обвинувања за корупција, измама и местење натпревари, пренесуваат странските медиуми.

Најголемата затворска казна ја доби поранешниот директор на клубот од Памплона, Анхел Вискај, осум години и осум месеци, за обвинувања кои вклучуваат нелегално вработување, фалсификување сметки и спортска корупција.

Голема истрага беше започната откако се појави сомнение во регуларноста на натпреварот помеѓу Осасуна и Бетис одигран на крајот од сезоната 2013/2014, мечот заврши со победа на тимот од Памплона со 2:1, со што клубот во последен час го задржа елитниот статус, но потоа се откри дека е наместено.

Двајца тогашни играчи на Бетис, Антонио Амаја и Чаби Торес завршија на обвинителна клупа поради сомнението дека примија пари да „помогнат“ во триумфот на Осасуна, поради што Судот им изрече по една година затвор.

Истрагата утврди дека директорите на Осасуна тогаш парично го мотивираа споменатото дуо од Бетис и во претпоследното коло го совладаат Реал Ваљадолид.

Ова е инаку првпат во шпански суд едно или повеќе лица да добијат затворска казна  поради местење натпревари.

Двајца агенти за недвижнини се исто така осудени за фалсификување и осудени се на девет месеци затвор. Сите обвинети имаат право на жалба во рок од два месеци од изрекувањето на казната.