По двата порази на домашен терен, македонскиот женски кошаркарски клуб Бадел 1862 во својот трет настап сезонава во регионалната ВАБА лига триумфираше на гостувањето во Босна и Херцеговина кај Бановичи со резултат 57:70.

„Баделки“ се првата екипа во нашата женска кошарка која запишаа триумф во оваа сениорска конкуренција од Јадранската лига.

На денешната средба тргнаа доста добро, во уводниот период веќе имаа двоцифрена предност (18:6), која до полувремето ја зголемија, односно водеа со 38:20.

Тоа беше најава дека кошаркарките во „сино-жолта“ комбинација се уверени во историскиот триумф. Во продолжението, играта беше доста поизедначена, што во принцип и беше сосема доволно за кошаркарките на Бадел 1862 ја одбранат предноста од првиот дел, и да стигнат до толку посакуваната победа.

До триумфот ги водеше Кметовска со 24 поени и шест скока, Стојановски запиша 18 поени, четири скока и две асистенции, а Димовска пак запиша „дабл-дабл“ учинок од 16 поени и 10 скокови, плус три асистенции.