Попладнево е пронајдено телото на 42-годишен жител на Тетово, чијашто сопруга пријавила дека вчера во 18 часот излегол од дома и оттогаш не се јавувал на телефон. Според првичните информации од МВР, човекот бил пронајден застрелан во неговиот џип „Ауди“ во околината на градот.

„Утрово во 2 часот во СВР Тетово Б.Б.(33) пријавила дека вчера околу 18.00 часот нејзиниот сопруг А.Б.(42) се оддалечил од домот со патничко со моторно возило „Ауди“ со тетовски регистерски таблици и не се јавувал на телефонските повици. Денес околу 16:15 часот во ниви во атарот на селото Нераште, полициски службеници од Полициско одделение Теарце забележале паркирано возило „Ауди Q5″ со тетовски регистерски таблици. Внатре во возилото е забележано е машко лице, кое не давало знаци на живот. На возачкото стакло имало отвор од испукан проектил и лицето во пределот на главата било облеано во крв, со првично сомневање дека било застрелано со огнено оружје“, соопшти СВР Тетово.

Лекар од Итната медицинска помош констатирал смрт, а по увидот од Јавен обвинител и увидна екипа од СВР Тетово, било потврдено дека се работи за А.Б. од Тетово.