Иранската новинска агенција „Мехр“ објави за напад врз американската воена база во Хасака, североисточна Сирија, денеска попладне, повикувајќи се на извори, без да прецизира кој ја нападнал американската база.

Агенцијата пренесува дека информирани извори изјавиле дека нападот бил извршен врз американска база лоцирана во западниот дел на сириската провинција Хасака.

Станува збор за американската база Касрак, која ја има најдолгата писта изградена од американските сили во Сирија, долга околу 1,7 километри.

По нападот, истите извори соопштија дека на главниот влез во базата биле воведени засилени безбедносни мерки.

Според извори на арапската новинска агенција Ал Маалома, инцидентот се случил утрово кога објектот бил нападнат со минофрлачка граната. Се наведува дека засега нема информации кој го испукал и од каде дошол.

Се тврди дека по гранатирањето, американскиот контингент стациониран во базата бил ставен во состојба на готовност, неколку американски хеликоптери биле подигнати, а американски војници ја пребарувале областа околу објектот.