Вештачката интелигенција ги „проголтала“ речиси сите информации достапни на интернет, но компаниите за вештачка интелигенција имаат потреба од уште повеќе.

Моделите на вештачка интелигенција како ChatGPT на OpenAI и Gemini на Google се соочуваат со сериозно ограничување: им снемува корисни податоци за обука, предупреди главниот директор за податоци на Goldman Sachs, Нима Рафаел, и повеќе немаат доволно „храна“ за понатамошно учење.

Во поткастот „Exchanges“, Рафаел рече дека овој проблем би можел да го забави понатамошниот развој на вештачката интелигенција.

„Веќе ни снемува податоци“, рече Рафаел, објаснувајќи дека моделите сè повеќе се потпираат на синтетички податоци, односно на оние генерирани од самата вештачка интелигенција.

„Интересно е да се размислува за можна креативна заситеност… Ако сите податоци станат синтетички, уште колку човечки податоци можеме да вклучиме? Филозофски тоа ќе биде многу интересно да се набљудува.“

Ова не е прв пат експертите да предупредуваат за феноменот познат како „peak data“ (максимум на податоци), моментот во кој системите со вештачка интелигенција го исцрпуваат поголемиот дел од содржината достапна на интернет. Во статија објавена во списанието „Nature“ во декември беше предвидено дека оваа „пресвртна точка“ ќе се случи до 2028 година.

„Интернетот е огромен океан на човечко знаење, но не е бесконечен“, наведуваат авторите. „Истражувачите на вештачката интелигенција речиси го исцрпија.“

Илја Сутскевер, коосновач на OpenAI, предупреди за истото минатата година, наведувајќи дека недостатокот на нови податоци неизбежно ќе го забави развојот на вештачката интелигенција.

-Достигнавме „peak data“ и нема да има повеќе нови податоци“, рече Сутскевер. „Мораме да функционираме со она што го имаме. Постои само еден интернет.“

Тој ја спореди содржината од луѓето со фосилни горива, ограничен ресурс кој не може да се користи бесконечно.

Ограничената количина на свежи податоци креирани од луѓето би можела да ги принуди компаниите како OpenAI, Google и Anthropic да се оддалечат од класичните големи јазични модели и да се свртат кон агенти на вештачка интелигенција. Овие агенти функционираат како автономни системи кои можат самостојно да извршуваат задачи и да донесуваат одлуки на интернет без директен човечки надзор.

Повеќето големи компании за вештачка интелигенција веќе развиваат вакви системи, што, според некои аналитичари, би можело да биде следниот чекор во еволуцијата на вештачката интелигенција, пишува „Индипендент“. Други аналитичари сугерираат дека „ОпенАИ“ ќе се обиде да го реши овој проблем со производство на хардвер кој, за да функционира, постојано ќе собира свежи податоци од непосредната околина на корисникот.

„Мета“ игра слична игра со своите очила за проширена реалност.