Додека постојаното ажурирање на вашиот паметен телефон може да предизвика вознемиреност, исто така, може да се појави страв од губење или заборавање на вашиот телефон. Стравот што го чувствувате кога ќе сфатите дека можеби сте одделени од вашиот телефон се нарекува номофобија, и тој, како и секоја друга фобија, може негативно да влијае на квалитетот на животот и здравјето.

Всушност, терминот е измислен во 2008 година од страна на британската пошта за да се утврди дали мобилните телефони предизвикуваат вознемиреност, според студијата објавена во 2019 година во Журнал за семејна медицина и примарна здравствена заштита. Тогаш околу половина од испитаниците изјавиле дека чувствуваат стрес кога не се во близина на нивниот телефон.
Сепак, номофобијата не се смета за дијагностичка состојба на менталното здравје, бидејќи не е наведена во најновата верзија на Дијагностички и статистички прирачник за ментални нарушувања (ДСМ), златен стандард за психијатриски состојби.

Номофобијата може да го наруши квалитетот на вашиот сон

Студија од 2020 година објавена во списанието Спиј открива дека 90 проценти од анкетираните 327 универзитетски студенти можат да се карактеризираат дека страдаат од умерено до сериозно ниво на номофобија. За жал, номофобијата е поврзана со нарушувања на спиењето, дневна поспаност и лоши хигиенски навики за спиење.

Учесниците признале дека проверувале е-пошта, пораки или социјални медиуми откако ги исклучиле светлата за да си легнат, објаснува д-р Сц. Џнифер Пешка, коавтор на студијата и вонреден професор по психологија на универзитетот Хендрикс во Конвеј, Арканзас.

Вознемиреност

Дали некогаш сте имале такво непријатно чувство во стомакот кога не се сеќавате каде го оставивте телефонот? Или, можеби сонувате дека вашиот телефон е изгубен или украден?

„Мислам дека навистина може да се гледа на номофобијата како посебна форма на вознемиреност“, вели Пешка.

Причините зошто некој има номофобија се различни.

„Мислам дека различни луѓе се грижат за различни работи. Се чини дека некои луѓе се грижат дека ќе пропуштат нешто или дека нема да можат да побараат помош или да контактираат некого ако треба“, објаснува таа.

Знаци дека имате номофобија:

Ако не можете да заспиете без да ги прелистувате вестите на вашиот мобилен телефон, звуците на известувањата се вклучени цела ноќ за да бидете сигурни дека не пропуштате ништо или телефонот е секогаш во ваши раце… можеби имате номофобија.

Исто така постои и корисен, поспецифичен прашалник развиен од истражувачи во 2010 година. Тоа е збирка од 20 прашања на скала од еден до седум (едно значи „не се согласувате целосно“ и седум дека „целосно се согласувате“). Ако вашиот резултат е поголем од 20, тоа е знак дека имате лесна номофобија. Ако имате повеќе од 100 поени (од можни 140 поени) тоа е сериозна номофобија, пишува магазинот Здравје.

Еве еден примерок од пет прашања што треба да си ги поставите, што е добра почетна точка за забележување проблеми:

1. Би се чувствувал непријатно без постојан пристап до информации преку мојот паметен телефон.

2. Би бил нервозен ако не можам да пристапувам до новостите преку мојот паметен телефон.

3. Би се исплашил да останам без батерија на мојот паметен телефон.

4. Ако немам податочен сигнал или не можам да се поврзам на Wi-Fi мрежа, постојано проверувам дали имам сигнал.

5. Би бил нервозен ако не го имам мобилниот телефон со мене затоа што би бил одделен од мојот идентитет на Интернет.