И капитенот на МЗТ Скопје Стојановски позитивен на ковид-19
Лошиот период во аеродромскиот тим продолжува со веста која го растревожи утринава дека позитивен на коронавирусот е и капитенот на екипата, Дамјан Стојановски.
И тој, како тренерот Дарко Радуловиќ, почувствува благи симптоми по средбата со Академија ФМП, по што веднаш замина во домашна изолација и се тестираше.
Дека ова е сериозен проблем за клубот, но и за сите негови претходни и идни противници, потврдува и фактот што уште двајца кошаркари на МЗТ чувствуваат благи здравствени проблеми, поради што и на нив им е закажано тестирање на ковид-19.
Поради сето ова, МЗТ Скопје Аеродром со дозвола од неговиот следен противник Пелистер, побара одложување на утрешниот дерби-натпревар во шампионатот, со цел да се спречи понатамошното ширење на вирусот, како во тимот на МЗТ, така и во битолскиот состав, кому му се благодарни што веднаш излезе во пресрет.
– Здравјето на кошаркарите и на двете екипи е во првенствен интерес за управите на двата тима, поради што се надеваме дека и намерата на КФМ ќе биде заштита на играчите, меѓу кои има и многу репрезентативци. А, на нашиот капитен Дамјан му посакуваме лесно да го мине периодот во изолација, без никакви проблеми и да ја „нокаутира“ болеста со серија тројки и два-три атрактивни влеза, нешто што е заштитен знак во целата негова кариера – информираат од КК МЗТ Скопје Аеродром.