Хрватска се соочува со можен недостиг на лекови поради големиот долг на државата кон веледрогериите што во моментот изнесува околу 700 милиони евра (над пет милијарди куни). Претставници на веледрогериите денеска демонстративно заминаа од состанокот со министрите за финансии и за здравство, Здравко Мариќ и Вилијем Берош, тврдејќи оти не им е понудено решение.

– Можам да бидам партнер на системот до две милијарди куни. Ние повеќе од две милијарди куни не можеме да толерираме. Тоа е работа на Владата, изјави претставничка на една од веледрогериите.

Таа додаде дека долгот на болниците е 4,3 милијарди куни, а аптеките должат уште 700 милиони куни, па вкупниот долг надминува над пет милијарди куни.

Министерот за финансии Мариќ истакна дека лековите се важни, но оти треба да се земе во предвид и каква е ситуацијата со буџетот. Тој додаде дека се пред договор и оти ќе продолжат разговорите, а дел од средствата ќе биде обезбеден со ребаланс на буџетот.

– Настојуваме преку прераспределба да најдеме дел од средствата и се надевам дека избегнеме застој во дистрибуцијата на лекови, посочи Мариќ.