Кошаркарите на Хапоел се вратија во игра во четвртфиналната серија од Евролигата, откако на домашен терен го совладаа Реал Мадрид со 76-69 и намалија на 2-1 во победи.

Шпанскиот гигант имаше мала предност по првото полувреме (36-34), но пресвртот се случи во третата четвртина, која израелскиот тим ја доби убедливо со 21-10 и практично го трасираше патот кон победата.

Најзаслужни за триумфот беа Џонс и Брајант со по 19 поени. Џонс натпреварот го збогати и со седум скока и две асистенции, додека Брајант запиша девет скока и три асистенции. Солиден настап имаше и Василије Мициќ со 13 поени.

Во таборот на Реал, најефикасен беше Лајлс со 14 поени, пет скока и две асистенции, додека Габриел Дек додаде 11 поени. Двоцифрен учинок имаше и Факундо Кампацо со 10 поени, четири асистенции и два скока.

Четвртиот натпревар од серијата е закажан за четврток, кога Хапоел повторно ќе ја има предноста на домашниот терен.