Грчката федерација на угостителски и сродни професии, со поставување на празни столици вечерва ќе учествува во европските симболични протести под наслов „Empty chairs” , за да побара ефективни решенија за спас од кризата.

Централниот настан кој според организаторите ќе претставува „нем симболичен чин“ е закажан за 20 часот на плоштадот Синтагма во Атина.

Според најавите, претставници на Федерацијата ќе постават празни столици, без присуство на вработените и сопствениците од конкретниот сектор.

Рестораните и кафулињата во Грција, планирано е да се отворат на 1 јуни, но само надворешните делови.

Грчкиот премиер Кирјакос Мицотакис вчера рече дека доколку епидемиолошката ситуација во земјата се движи во иста насока како и досега, тогаш е апсолутно изводливо отворањето на 1 јуни, но под веќе поставените предуслови.