Селекторот на женската сениорска ракометна репрезентација на Македонија, Кристијан Грчевски го објави поширокиот список на ракометарки повикани за претстојната ЕХФ недела.

На поширокиот список се наоѓаат 35 ракометарки за подготовка и настап за претстојните квалификациски натпревари против Германија и Словенија во рамките од квалификациите за пласман на Европското првенство 2026.

Македонија ќе игра против Германија на 8 април од 18.00 часот во Спортскиот центар „Борис Трајковски“ во Скопје, а во истиот термин на 12 април ќе игра на гости против Словенија во Велење.

Германија која е првопласирана во квалификациската група 3 веќе обезбеди пласман на континенталниот собир.

Следува Словенија на второто место со четири бодови, пред Македонија и Белгија по три.

Првопласираните две репрезентации од секоја група, како и четири најдобро третопласирани ќе одат на ЕП.