Стотина граѓани и попладнево го блокираа патот Битола-Ресен на излезот од Битола, целосно затворајќи го патот за сообраќај. Станува збор за истите луѓе кои вчера излегоа на протест и палеа гуми на патот. Тие објаснија дека се незадоволни од тоа што на неколкумина од нив им биле одземени автомобилите поради тоа што немале положено возачки испит.

Граѓаните велат дека се дискриминирани од прописите кои налагаат кандидатите да имаат завршено основно образование за воопшто да можат да полагаат за возачка дозвола.

„Патниот сообраќај на магистралниот пат А3 Битола – Ресен над населбата Баир во Битола од 14.30 часот е во прекин бидејќи во тек е јавен собир“, информира попладнево Авто-мото сојуз на Македонија.

Како што посочуваат од АМСМ, сообраќајот се пренасочува низ Битола.

Протести против одземањето на автомобилите од страна на полицијата, граѓани вчера одржаа и во Кочани и во Прилеп. Премиерот Мицкоски, коментирајќи ги вчерашните собири, ги нарече „дивеења“ и повика на жесток одговор од полицијата доколку продолжат.