Градоначалникот на Град Скопје, Орце Ѓорѓиевски, денеска ги додели признанијата за најдобар пожарникар, полицаец и крводарител во градот за 2025 година.

За најдобар пожарникар е прогласен Игор Станишев, командир на одделение во Бригадата за противпожарна заштита на Град Скопје, човек кој учествувал во гаснење на бројни пожари и интервенции за заштита и намалување на материјалните штети, а пред сè, како што вели Ѓорѓиевски, човек чија храброст и пожртвуваност резултирале со спасување на голем број човечки животи.

Признанието за најдобар полицаец му припадна на Кристијан Стефановски од ПС Карпош. Тој е предложен од СВР Скопје поради својата исклучителна посветеност, професионализам и значаен придонес во остварувањето на бројни работни активности и постигнувањето конкретни резултати во полициската работа.

За најдобар крводарител е прогласена Виолета Гиноска,  која со повеќе од 45 дарувања крв се вбројува меѓу најпосветените и најистакнати крводарители.

Од срце им благодарам на овие херои. Тие се доказ дека вистинските вредности живеат меѓу нас и дека секој чин на храброст, пожртвуваност и хуманост го прави Скопје посилно и похумано место за живеење. Нека нивниот пример биде поттик и инспирација за сите нас, да бидеме подобри луѓе и да градиме град заснован на солидарност, одговорност и меѓусебна почит – вели градоначалникот Ѓорѓиевски..