Гостиварскиот театар со претставата „Ачик ајле“ ќе гостува на сцената на Турскиот театар во Скопје
На големата сцена на Турскиот театар во Скопје на 13 декември, во 20 часот, ќе биде изведена претставата „Ачик ајле“ (Açık aile) на Гостиварски театар – Гостивар, која неодамна имаше премиера на матичната сцена.
Претставата е работена по делото „Отворен пар“ на италијанскиот автор Дарио Фо. Режисер на претставата е реномираниот Сулејман Рушити. Жанровски претставата е комедија и ќе биде изведена на турски јазик.
Актерската екипа ја сочинуваат Инес Радончиќ, Береда Решит, Елизабета Клиничаревска Младеновска и Исмаил Омер, а музичкиот перформанс го изведуваат музичарите Фатон Стафаи, Хабиб Несими и Марсел Ајдари. Изборот на музиката која се изведува во живо е на Теута Халими Селмани.
Режисерот Рушити, оваа претстава паралелно ја режираше и на албански јазик, а покрај нашите актери Елизабета Клиничаревска Младеновска и Исмаил Омер, во изведбата на албански јазик играат и актерите Роми Зала и Дуела Бако од Тирана, Албанија.
Претставата на албански јазик имаше премиера на крајот од ноември во Народниот експериментален театар „Кујтим Спахивогли“ во Тирана, а потоа премиерно беше изведена и на сцената на театарот „Александар Мојсиу“ во Драч, а ќе биде на постојниот репертоар и на двата театри.