Обожавателите на легендарниот бенд „Квин“ имаат причина за славење. Брајан Меј потврди дека бендот ќе објави претходно необјавена песна, снимена пред 51 година, за Божиќ, пренесува „Дејли мејл“.

Познатиот гитарист ќе води божиќен специјал на дигиталната радио станица „Планет рок“ на 22 декември од 18 часот, каде публиката ќе може за првпат да ја чуе песната „Not For Sale“. Станува збор за песна што Меј ја напишал уште во 1974 година, за време на снимањето на вториот албум на бендот, „Queen II“, но во тоа време не се најде на конечната листа на песни.

Песната сега е ремастерирана и ќе биде дел од реизданието на албумот „Queen II“, кој ќе биде објавен во 2026 година. Сепак, обожавателите ќе можат да ја слушнат ексклузивно порано – токму во божиќната радио емисија на Меј.

– Сè уште е во тек и ќе се појави на новиот албум на „Queen II“ следната година, но го вклучив во специјалот „Планет рок“ бидејќи навистина ме интересира што луѓето имаат да кажат – рекол тој.

Меј, исто така, им посака на фановите Среќен Божиќ и просперитетна Нова Година.

„Квин“ издадоа 15 студиски албуми во текот на нивната кариера. Последниот, „Made In Heaven“, беше издаден во 1995 година, четири години по смртта на пејачот Фреди Меркјури, кој почина во 1991 година на само 45-годишна возраст од СИДА. Албумот содржеше вокали и пијано делови што Меркјури ги сними години претходно.

Божиќното шоу на Брајан Меј, кое ќе се повтори на самиот Божиќ, ќе го претстави неговиот личен празничен џубокс од неговите омилени божиќни песни. Програмата ќе вклучува хитови од уметници како Слејд, Чак Бери и Кристалс, како и специјално изненадување за неговата сопруга, актерката Анита Добсон.

Брајан Меј и „Квин“ подготвуваат вистинско божиќно музичко изненадување за фановите оваа година.