Американските власти почнаа опсежна антимонополска истрага против компанијата „Мајкрософт“, фокусирајќи се на нејзините практики во областа на вештачката интелигенција (ВИ) и услугите „клауд“. Оваа истрага, која ја води Федералната комисија за трговија, опфаќа неколку аспекти на делувањето на овој технолошки гигант.

Основната тема на истрагата е потенцијалното користење на доминантната позиција на „Мајкрософт“ на „клауд“ пазарите и безбедносните решенија, преку спојување на своите услуги. Компанијата е обвинета дека нефер ги комбинира своите производи како што е „офис“ и безбедносните апликации со клауд-услугите, што може да создаде конкурентски нерамнотежи. Истражителите се сомневаат дека „Мајкрософт“ ги користи овие комбинации за да ги принуди клиентите да ги изберат нивните решенија, без оглед на тоа дали имаат подобри опции на пазарот.

Во исто време, се испитува и влијанието на стратегијата на „Мајкрософт“ во областа на вештачката интелигенција. „Мајкрософт“, преку големи инвестиции во компании како „Опен АИ“, значително ги зајакна своите капацитети во оваа технологија. Многумина експерти сметаат дека ова ја стави компанијата во доминантна позиција, што предизвика грижи за евентуална контрола над оваа брзо растечка индустрија.

„Мајкрософт“ е исто така под истрага за своето партнерство со „Опен АИ“ – компанијата што го промовираше виртуелниот соговорник Четџипити. Се истражува дали „Мајкрософт“ намерно ги избегнува антимонополските контроли со тоа што ги структурира своите договори така што не ги пријавува соодветно на властите.

Пример за тоа е договорот што „Мајкрософт“ го постигна со „Инфлекшн АИ“, стартап во кој компанијата инвестираше 650 милиони долари. Иако „Мајкрософт“ не ја купи компанијата, тој договор овозможи компании да го користат интелектуалниот капитал на „Инфлекшн АИ“, што потенцијално го зголемува доминантниот статус на „Мајкрософт“ без потреба за антимонополски надзор​.

Истрагата на „Мајкрософт“ е во рамките на пошироката кампања на администрацијата на претседателот Џо Бајден за засилување на регулативата врз големите технолошки компании. Минатата година, некои од најголемите технолошки гиганти како „Гугл“, „Амазон“ и „Мета“ беа подложени на слични истраги. Властите во Вашингтон, исто така, разгледуваат како компаниите од технолошката индустрија ги користат своите ресурси за да ги елиминираат помалите конкуренти, а тоа влијае на различни индустрии, од клауд технологии до развој на вештачка интелигенција.

Информациите од различни извори покажуваат дека истрагата врз „Мајкрософт“ може да има далекусежни последици, не само за самата компанија, туку и за индустријата во целост.

Ако се докаже дека „Мајкрософт“ ја злоупотребил својата моќ на пазарот, може да се воведат нови санкции или регулативи кои ќе ги променат правилата на играта за големите технолошки компании, особено во секторите кои се во брз раст како што е вештачката интелигенција.