Ѓукиќ: Одиме на победа и во Охрид и заедно со навивачите да славиме европски трофеј
Ракометарите на Охрид се поблиску до трофејот во ЕХФ Европскиот куп откако минимално со 29:28 триумфираа против екипата на Татабања во Унгарија.
Препорачано
Играчите предводени од тренерот Борис Ројевиќ можат да жалат што не извојуваа поубедлива победа, во текот на првиот дел имаа и предност од седум голови разлика.
Македонскиот претставник имаше високо водство и во текот на второто полувреме, во 48 минута на семафорот стоеше 25:19.
Во текот на мечот имаше доста исклучувања, вкупно 10 во редовите на ГРК Охрид, и тоа Унгарците го искористија, ја кренаа трибината на нозе со серија од 5:0, а потоа направија и целосен пресврт кога Родригез постигна гол за 28:27, и тоа само за прво водство на Татабања, на минута пред крајот.
Во самата завршница, ГРК Охрид се снајде подобро, Иванковиќ и Ѓукиќ постигнаа голови за минимален триумф.
Српското десно крило, Дарко Ѓукиќ, заедно со хрватскиот лев бек Анте Иванковиќ беа најефикасни со по седум головите за охридскиот клуб.
– Го дадовме максимумот на првиот натпревар против Татабања. На крајот остваривме минимална победа, некој да ни ја понудеше пред мечот, сигурно ќе ја прифатевме. Останува жал бидејќи имавме и шест-седум голови предност. Игравме одлична одбрана во првото полувреме, а во вториот дел мислам малку критериумот не беше на двете страни, но тоа е нормално, тие се домашна екипа, финале е. Ќе дадеме сè од себе, да победиме и на реваншот во Охрид и заедно со навивачите, кои дојдоа и тука, да ни ја дадат поддршката и да го освоиме трофејот, доколку даде Бог – рече Ѓукиќ по првиот меч со Татабања.
Реваншот ќе се игра на 31 мај од 20.00 часот во салата „Билјанини Извори“ пред полни трибини.
