Германскиот вицеканцелар Роберт Хабек изјави дека не гледа можност за брзо и мирно решение на руската војна против Украина и дека Германија и Европската унија мора да се заштитат од воени напади. „Мораме да се прилагодиме на ситуацијата со заканата. Сè друго би било наивно“, рече тој во видеото објавено вчера на платформата Икс, порано позната како Твитер.

Затоа би било добро Германија да инвестира повеќе во сопствената безбедност, додаде тој. „Ние, како Германија и Европската унија, мора да се заштитиме на сите можни начини, вклучително и од воени напади“, рече Хабек.

Војната на рускиот претседател Владимир Путин против Украина е најкрвавиот конфликт што Европа го видела од 1945 година.

„Секој ден е ден на смртта и не се гледа крајот. Напротив, Русија на Путин целосно се префрла на воена економија и масовно го зголемува производството на оружје“, вели Хабек, кој е и министер за економија.

Во последниве недели, во Германија се појавија тврдења за природата и степенот на поддршката за Украина, „од кои некои беа горчливи, а некои вознемирувачки“, рече тој.

„Јас од самиот почеток зборував за испраќање оружје во Украина и сè уште сум за продолжување на нивната поддршка со се повеќе и повеќе воена опрема“, рече Хабек.

Сепак, тој го почитува ставот дека поради морални принципи или верски убедувања доаѓа до заклучок поинаков од неговиот кога станува збор за испраќање оружје во Украина.

„Исто така, многу добро разбирам дека луѓето се плашат од ескалација на војната. Исто така, загрижен сум. Прашањето е каков став и каква акција е потребна за да се спротивставиме на оваа закана. Владата ќе мора постојано да се справува со ова“, рече тој.