Германка сликала маж повреден во сообраќајка и отишла на работа без да му помогне, сега ќе се појави пред суд
Судот во Дизелдорф започна судење против 41-годишна жена која, по сообраќајна несреќа во јули 2020 година, наводно фотографирала маж кој се борел за живот со својот мобилен телефон, а потоа отишла на работа, без да му помогне на човекот.
Како што пренесуваат германските медиуми, 41-годишната жена возела автомобил наеднаш застанала, а зад неа бил 60-годишен маж на мотор кој се лизнал и удрил во ограда. Жената го видела повредениот мотоциклист, излегла од автомобилот и го фотографирала него, автомобилот и моторот. Потоа отишла на работа, а човекот подоцна починал.
Жената тврди дека не е виновна за несреќата бидејќи директно не се судрила со мотоциклистот. Таа е обвинета за убиство од небрежност, загрозување на сообраќајот, удирање и бегство и кршење на личните права со фотографирање на лице на умирање.
„Доцна сфатив дека погрешив. Не ја знаев улицата. Фотографиите од мотоциклистот веднаш му ги испратив на шефот за да поверува дека несреќата е причината поради која доцнам на работа“, изјави обвинетата.
Тројца сведоци на несреќата пред судот потврдија дека жената рекла дека мора да оди на работа и се оддалечила.