Германија планира да ја третира употребата на таканаречените „дроги за силување“ како оружје во кривичните постапки, како дел од пошироката стратегија за подобрување на правната заштита на жртвите на семејно и сексуално насилство.

Германскиот министер за внатрешни работи Александар Добринт изјави дека овие супстанции стануваат сè почесто средство за извршување криминални дела и дека нивната нова класификација ќе овозможи значително построго гонење на сторителите.

Добринт потенцираше дека жените мора да се чувствуваат безбедно каде и да се движат. Според официјалните податоци, во 2024 година речиси 54.000 жени и девојки во Германија биле жртви на сексуални злосторства, што претставува зголемување од 2,1 проценти во однос на претходната година. Во околу 36 проценти од случаите станувало збор за силување или тежок сексуален напад, пренесува Ројтерс.

Парламентарната расправа за воведување задолжителна минимална затворска казна од пет години за употреба на дроги за силување при сексуален напад беше одложена минатиот месец.

Федералната влада, исто така, го засилува фокусот врз борбата против семејното насилство, кое најчесто ги погодува жените. Минатата година полицијата регистрирала рекордни 266.000 жртви на семејно насилство, што е пораст од 3,8 проценти, но шефот на Федералната криминална полиција, Холгер Менш, предупреди дека бројот на непријавени случаи останува висок. Тој апелираше за подобра поддршка што ќе ги охрабри жртвите да пријавуваат.

Во 2024 година биле забележани околу 1.200 случаи на убиство или обид за убиство на жени и девојчиња – благо намалување во однос на претходната година.

Оваа недела германската влада одобри нацрт-закон што овозможува употреба на електронски нараквици за следење на сторителите на семејно насилство. Жртвите, пак, ќе можат да побараат посебен уред кој ги предупредува доколку сторителот се приближува.