Германија издаде меѓународни потерници за основачите на Мосак Фонсека

Германските судски власти издадоа две потерници за апсење на основачите на панамската адвокатска фирма „Мосак Фонсека” (Mossack Fonseca) околу која пред четири години избувна скандал по објавувањето на таканаречените „Панамски документи”.

Според „Зидојче цајтунг”, станува збор за 72-годишниот Јирген Мосак и 68-годишниот Рамон Фонсека. И двајцата имаат панамски пасош, а Панама генерално не ги екстрадира своите граѓани, наведува весникот. Затоа е исклучително мала веројатноста да се соочат со германската правда.

Мосак и Фонсека се осомничени за помагање во затајување данок. Претставник на обвинителството во Келн потврди „постоење на две меѓународни наредби”, но не прецизираше на чии имиња се издадени.

Во април 2016 година, Меѓународниот конзорциум на истражувачки новинари (ICIJ), со седиште во Вашингтон, објави извадоци од 11,5 милиони документи кои содржат информации за сметки во странство на голем број сегашни и поранешни светски лидери, истакнати политичари и претприемачи, спортисти и менаџери. Извештаите, наречени „Панамски документи”, се базираат на протекување од Мосак Фонсека – панамска компанија која обезбедувала правна поддршка за регистрација на офшор компании.

Во 2017 година, Германската федерална служба за кривични и правни прашања доби база со податоци од панамски досиеја од 2,8 терабајти и формираше работна група за проучување на информациите. Како резултат на тоа, во Германија беа отворени повеќе од 150 случаи.

(Извор: МИА)

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот